Bainuontzia daukat

Bainuontzia burgesa da» esan zidan lehengoan ezagun batek bainuontzia banuela esan ostean. Hain da proletarioa gure Euskal Herria. Nire bainuontzi arrunta burgesa da eta bere etxeko dutxa ultra moderno saunaduna ez; auskalo zer ote den bera. Harrigarriak gara. Solasaldiak aurrera jarraitu zuen; autoetaz berbetan hasi ginenean berriz ere «burges» deitu zidan erdeinuzko modu ulergaitzean. Autogorrotoa, berriro. Neure hamalau urteko kotxea burgesa da, ez, berriz, berak erosi berri duen California hornitu txatxia. Hori funtsezko beharrizana da (oinarrizko soldatarekin batera emango du Gobernuak maiatzaren 1etik gora). Ezagun honek nire soinekoak burgesak direla uste du; bere mendi-arropa garestia, baina, ez da burgesa; praktikoa da. Ondo jakina baita gure herri txit eder honen ehuneko handiena oihana dela, eta mendi arropa tekniko eta garestia ezinbestekoa dela handik eta hemendik ibiltzeko.

Ezagun horrek guaikeria lar daukala esango nuke. Orain feminismoa deskubritu du eta super feminista da. Beragaz jabetu nintzen feminismoa modan dagoela. (Libra nazala munduak moda-modako kontuetaz). Tira, itzelak esan diezazkizuke minutu batean. On/off ari nintzen bere ele-melekerien aurrean. Halako batean esan zidan nik ez nituela emakumeak maite. Estonatuta, ni. «Sexualki, esan nahi duzu?» galdetu nion. Ez nekien ulertu niona ondo aditu ote nion. Eta bai, tamalez, ondo aditu nion. «Orokorrean» erantzun zidan. Nire ezagun super guai eta orain ultra feministak ez dakiena da feminismoaren moda pasatzen zaionean (berari eta beste askori ere) nik emakume izaten jarraituko dudala. Alegia, borrokan jarraitu beharko dudala nahi eta nahi ez.

Eta horrela beste hamaika gauza konta niezazkizuke. Baina, zertarako? Zenbat energia galtzen dugun ergelkeria galantekin. Zein nahastuta gauden. Zenbat kalte egiten digun autokritika ezak. Ai, energia hau dena ganorazko kontuetan xahutuko bagenu.