astekaria 2016/03/11
arrowItzuli

politika

NAGUA ALBA

«Positiboa iruditzen zaigu EH Bilduk eta EAJk elkar ulertzea»

Jokin Sagarzazu

«Positiboa iruditzen zaigu EH Bilduk eta EAJk elkar ulertzea»

Asteburuan aukeratu zuten Nagua Alba (Donostia, 1990) Ahal Dugu-ren idazkari nagusi Araban, Bizkaian eta Gipuzkoan. Azken egunetan askotan galdetu diote horrelako kargu baterako gazteegi ez ote den, eta berak beti erantzuten du gauza bera: «garrantzitsuena» taldea dela. Alderdiaren sorreran parte hartu zuen Madrilen, han Donostian hasitako psikologia ikasketekin segitzen ari zela. Abenduan aukeratu zuten Espainiako Kongresurako diputatu, Gipuzkoan. Hauteskunde horien bezperan dimititu zuen Roberto Uriarte buru zuen aurreko zuzendaritzak, eta talde horrek babestu duen hautagaitzari (Kaliangora) aurrea hartuta irabazi ditu berak eta bere zerrendak barne hauteskundeak.

15.000 boto posibleetatik 1.076: %7. Eta bigarrenari 133 botoren aldea atereaz. Nahikoa iruditzen zaizu babes hori?

Bai. Baina horrek ez du esan nahi beste hautagaitzak integratuko ez ditugunik, baita ordezkaritza lortu ez dutenak ere. Zuzendaritza kohesionatu eta indartsu bat osatuko dugu.

Nola? Herritar kontseiluko, zuzendaritzako beste 34 postuetatik 28 dira zure zerrendakoak.

Gai zehatzen inguruan lantaldeak sortzeko orduan integratuko ditugu haiek eta herrietako zirkuluetan parte hartzen duten pertsonak. Eguneroko erabakietan ere sartu nahi ditugu beste ahots horiek, eta kontuan hartu.

Madrilgo zuzendaritzarekin lotura organikoa duzue zuk eta zure zerrendako batzuek. Iazko barne hauteskundeetan ez zineten aurkeztu. Zergatik orain bai?

Espainiako hauteskunde orokorren kanpainan asko ikasi genuen denok elkarrekin joanda, eta emaitza oso onak lortu genituen. Bide hori eraman nahi genuen Euskadiko zuzendaritzara, eta herritarrek babestu dute.

Dimisioa eman zuen aurreko zuzendaritzak, Espainiakoarekin zituen desadostasunak direla eta. Madrildik su horiek itzaltzeko aurkeztu zarete orain?

Ez da egia Madrilen ordezkariak garenik. Gure zerrendan denok ez dugu berdin pentsatzen, eta hori ona da. Baina argi dugu hemen erabaki garrantzitsuenak hemengo herritarrek hartuko dituztela, batzarrean. Gure lana Euskadin egin behar dugu, eta hemengo gaien inguruan, eta horiek estatu mailara eraman gero.

Nola?

Bi norabideko harremana dugu Madrilgo zuzendaritzarekin. Kanpainan ere erakutsi genuen handik hona gu laguntzera etortzen direnek babesten dituztela guk hemen hartzen ditugun erabakiak edo ditugun ikuspuntuak: erabakitzeko eskubideari buruz, kontzertu ekonomikoari buruz...

Eta ez badituzte babesten?

Hemen erabakia gehiengo handiz eta modu demokratikoan hartua baldin bada, ez dut uste oztoporik jarriko dutenik, haiek ere eztabaidatu ondoren.

Hemen bezala, beste zuzendaritza batzuetan —Galizian, Katalunian...— egon dira dimisioak azkenaldian, Espainiakoarekin kritiko. Zer esan nahi du horrek?

Alderdi plural bat garela, beste denek bezala desadostasunak ditugula gure artean, eta, horiek demokratikoki kudeatuz gero, indartuta ateratzen garela. Hori gertatu da Euskadin. Esan behar da, gainera, Galizian eta Katalunian gertatzen ari dena eta hemen gertatu dena ez dela gauza bera.

Orduan zer gertatu da hemen orain arte esan ez denik?

Hemen dimisioak egon ziren, orduan eman ziren arrazoiengatik. Primarioak izan ditugu, eta herritarrek erabaki dute zer nahi duten. Berez, bukatu dira desadostasunak, sentsibilitate guztiak integratuko ditugulako zuzendaritza berrian. Batuago gaude orain.

Ez daude konforme barne hauteskundeetako prozesuarekin. Hitz egin duzu haiekin?

Ez dut lortu. Baina laster hitz egingo dut. Ez dut uste arazorik izango dugunik.

Uste duzu hemengo beste alderdiek ere erabil ditzaketela desadostasun horiek kontraesanak sortzeko, zuek zatitzeko?

Horixe saiatuko direla. Horregatik diot oso garrantzitsua dela denok norabide berean arraun egitea. Nik uste dut, aldeak alde, denok argi dugula hori.

Euskal Herriko beste alderdiek ez dute Madrilgo zuzendaritzara joko gai nagusiez hitz egiteko, negoziatzeko?

Oker egongo lirateke hori pentsatuko balute. Gu autonomoak gara, eta Euskadiko gaiak guk eramango ditugu zuzendaritzara.

Denok bat zatozte EAJ boteretik kentzea dela zuen helburu nagusia. Baina zein da zuen arerio nagusia?

Gure arerio nagusiak dira ezberdintasun sozialak, ustelkeria eta langabezia.

Baita EAJ eta EH Bildurenak ere, eta PSE, PP eta beste guztienak. Hori diote, behintzat.

EAJ boteretik kentzea da Euskadira aldaketa ekartzea, EAJk ez dielako herritarren interesei eta beharrei lehentasuna ematen; eliteentzat gobernatzen du.

Madrilen, dena den, jeltzaleekin akordioak lortzeko prest zaudete, eta eredu gisa jartzen dituzue haien zenbait gizarte politika.

Hori Madrilen esateak ez du esan nahi hemen nahikotzat jotzen dugunik. Hemen hobeto gaude, baina gehiago egin dezakegu. Eta Madrilen, berriz, gure helburu nagusia da PP gobernutik kentzea, hori ona ere badelako Euskadirentzat; EAJk horrekin bat egiten badu, primeran.

Zertan geratu da aurreko udan gizarte zibileko pertsona ezagun batzuek zuei, EH Bilduri eta ezker eraldatzaileari, oro har, bat egiteko eginiko deia? Bide horri heltzeko asmoa duzu?

Guk gure proiektua daukagu Euskadirentzat, eta hauteskundeak irabazi nahi ditugu. Ezberdintasun sozialen eta langabeziaren aurka borroka egin nahi duen orok ondoan izango gaitu. Baina gu gara orain euskal politikako protagonistak, eta rol nagusia jokatuko dugula uste dut.

Beraz, baztertuta aukera hori.

Eztabaidatu beharko dugu, baina nahiko argi daukagu Ahal Dugu gisa joango garela.

Balizko akordioen inguruan, zuk esan duzu alderdi batzuekin gai batzuei buruz eta beste batzuekin beste batzuei buruz. Erabakitzeko eskubideari buruz, norekin?

[Isilunea] Aldebikotasunaren alde gaude, eta negoziatzearen alde. Ikusi dugu zer gertatu den Katalunian, nola dauden, eta, gure ustez, hori ez da konponbidea; liskarrak handitu egiten dira, eta horrekin ez da ezer lortzen.

Baduzue asmorik erabakitzeko eskubideari buruzko egitasmoren bat eramateko Eusko Legebiltzarrera, ala besteek zer egiten duten zain geratuko zarete batzeko edo ez?

Bai, gu prest gaude proposamenak egiteko. Arazo politikoak demokratikoki konpondu behar dira, eta horretarako instituzioetara eraman behar da konponbidea.

Lehentasun bat da zuentzat erabakitzeko eskubidea?

Herritarrek eskatzen badute...

Non, nola?

Hauteskundeetan. Ikusi beharko dugu zer-nolako legebiltzarra geratzen den.

Eta legebiltzarrak onartutakoari Espainiako Estatuak ezetz esaten badio?

Aldebikotasuna eta negoziazioa, ez dago beste biderik. Horretan tematu behar dugu.

Ezker abertzalea oso integratua egon da gizartean, gizarte mugimenduetan, erakundeetan... Nola begiratzen diozue horri?

Hori asko aldatzen ari da azkenaldian, eta gehiago aldatuko da hauteskundeen ondoren. Euskal gizartean aldaketa handiak izan dira, eta uste dut guk oso ondo irakurri dugula hori. Esplikazio asko egon daitezke, baina nik uste dut jende asko zegoela guk ordezkatzen dugun espazio politikoaren zain, estatu osoan eskubide sozialen eta erabakitzeko eskubidearen defentsa egiten duen indar baten zain.

Zein izango da gakoa Euskal Herrian zuen proiektu politikoak iraun dezan?

Ez dugu analisi konkreturik egin, baina ikusten ari gara gure boto-emaileak oso homogeneoak direla adin tarteei begiratuta eta hiru lurraldeetan; horrek ematen digu oinarri sendo bat aurrera begira.

Gatazkaren ondorioen konponbideak —bizikidetzarekin loturikoak, armagabetzea, presoak...— konpondu behar dira aurretik beste gai batzuei heltzeko?

Gai hori funtsezkoa da, baina ezin dugu erabili elkarri leporatzeko. Horrek ezin ditu blokeatu beste gai batzuk eta akordioak. Argi dago denok begiratu behar diogula barrura. Gu eredu izan gaitezke horretan: gurean daude gatazkaren ondorioak sufritu dituzten alde batekoak eta bestekoak, eta, eztabaidak egon arren, ados jartzeko gai gara.

Garbiñe Biurrun Kaliangora zerrendaren lehendakarigaia zen?

Ez, ez. Argi dugu denok gure hautagaia independentea eta prestigio handiko pertsona bat izango dela.

Eta nork atera zuen haren izena? Zergatik?

Ez dakit.

Gustuko duzu?

Estimu handia diot, baina ez dut zuzenean berarekin hitz egin.

Kezkatzen zaitu zuen hautagaiak Otegirekin lehiatu behar izateak?

Ez. Gure proiektuak lortu zuen boto gehien aurreko hauteskundeetan. Otegi ez da gure arerioa.

Eta zuekin kezkatuta ikusten duzu Otegi?

Baliteke, eta normala da, ulergarria. Ikusten da argi daukala estatuko politika asko aldatu dela eta gu oso garrantzitsuak garela euskal politikan.

Uste duzu ezker abertzaleak handitu egingo duela zuekiko tentsio dialektikoa?

Ikusi beharko dugu zer-nolako ezker abertzalea eraikitzen den Otegiren presentziarekin eta noiz diren hauteskundeak: horrek asko eragingo du.

Madrilen gertatzen denaren arabera, Eusko Legebiltzarreko hauteskundeak aurreratuko diren susmorik baduzu?

Hori Urkulluk erabaki beharko du, baina argi dago egungo legebiltzarra ez dela euskal gizartearen isla.

Bozak aurreratzearen alde, beraz?

Problemarik ez, noski.

EAJk eta EH Bilduk Udal Legean akordio bat lortu izanak zer pentsa ematen dizue?

Guretzat ona da, bazelako garaia gai horrekin ados jartzeko. Eta elkar ulertze hori positiboa izan daiteke, baita aurrera begira ere, beste gai garrantzitsu batzuetarako.

Zer harreman duzue PSE-EErekin?

Ez dugu haiekin hitz egin. Sozialistekin gertatzen dena da ez daukatela jarrera koherenterik. Ezin gara askorik fidatu.

BERRIAn argitaratua (2016/03/10)


Informazio gehiago berria.eus-en

Izan zaitez berrialaguna


HASIERA