Etxetik ere egin liteke dantza

Konfinamenduak erabat eten zituen jarduera gehienak, baita dantzaren irakaskuntza ere. Etxean itxita, Sabin Bikandi Aiko taldeko dantza maisuak webcama piztu eta Aiko taldearen dantza ikasleek zuten hutsunea etxetik betetzea erabaki zuen. Berehala zabaldu ziren haren doinu eta urratsak sarean barrena, eta, ikasleak ez ezik, Euskal Herriko eta atzerriko dantzazale mordoa batu ziren Interneteko eskola inprobisatuetara. Konfinamendua igaro arren, dantzan aritzeko zailtasun eta oztopo anitz daude oraindik ere, eta, beraz, heldu den ikasturtean Internet izanen du lagun Aiko taldeak. Urrian abiatuko dute dantza eskola digitala.

Bi atal nagusi ditu egitasmoak: zuzeneko dantza eskolak eta autoikaskuntza bultzatzeko materiala. «Zuzeneko eskolak inportanteak dira guretzat, nolabait elkartzearen errituala irudikatzen dutelako; behintzat txaten bidez agurtu, topaketa bat izatea... nola edo hala hori mantentzen saiatuko gara», azaldu du Bikandik. Noski, eskola horiek gero grabaturik geldituko dira, une oro eskuragarri egoteko. Bigarren atala autoikaskuntzarena da, norberak bere kasa urratsez urrats ikasi edo errepasa dezan. Horretaz gain, eskola magistralak eta ikastaro monografikoak eginen dituzte.

Aikoren jarduna euskaraz izaten bada ere, zuzeneko eskolak hiru hizkuntzatan emanen dituzte: euskaraz, gazteleraz eta ingelesez. Itziar Villamandos Aiko taldeko komunikazio arduradunak eman ditu azalpenak: «Diasporara ailegatu nahi dugu, baita Europako beste herrialde batzuetara ere. Sabin webcamarekin aritu zenean, Argentina, Danimarka eta Italiako jendea konektatzen zen». Dagoeneko harremanetan jarri dira, besteak beste, AEBetako Renoko unibertsitatearekin eta Boiseko Euskal Museoarekin.

Birusa, azkenengo bultzada

Aurretik ere bazuten proiektua buruan, baina pandemiak eman die azkenengo bultzada. «Aspaldi, Andra Mari dantza taldean geundenean, ikusten genuen horrelakoen beharra jotarekin ibiltzen ginenean. Dantza maisuok dantzan egiten den prozesu mentala irudikatzeko eta partekatzeko beharrizana aspalditik ikusten genuen», kontatu du Bikandik. «Azken hiruzpalau urteetan argi ikusi genuen zer behar genuen: irudiak eta transkripzio erritmikoak bat egiteko modua».

Orain, noski, egoerak bultzatu ditu proiektua lehenbailehen bukatu eta kaleratzera. «Zuhur jokatu nahi izan dugu, orain ezin baita elkarrekin dantzatu. Beraz, modu digitalean egitea erabaki dugu», esan du Villamandosek. «Noski, saiatuko gara erromerietara itzultzen, eta posible denean, aurrez aurre egingo ditugu eskolak, baina eskola digitala osagarri izango da».

Duela sei hamarkada Bizkaiko dantzei buruzko liburua argitaratu zuen Jose Luis Etxebarria Txelu dantza maisuak. Bertan, zehatz-mehatz azaltzen zituen mugimendu koreografikoak melodien erritmoei eta notei atxikirik. Horrelako zerbait egitea lortu du Aikok, baina bisuala eta erabilerraza, dantzaren partitura eta bideoa batera ageri baitira. Musika mantsotu daiteke, bideoa ispilu bezala ikusi, edo partituraren edozein unetan klik eginda bideoak ere une horretara egiten du salto. «Txeluk guk ditugun baliabideak izan balitu, flipatuko zuen».

Dagoeneko dantza eskola birtualean izena emateko aukera dago aikoeskola.eus webgunean, eta zenbait tokitan aurkezpenak eginen dituzte urrian. Deus ez dakitenei eta dantzan dakitenei zuzenduak izanen dira eskolak, eta materiala erabilgarria izanen dela ziurtatu du Bikandik: «Oso kontent gaude; hau hasiera baino ez da: aurrez aurre aritzen garenean ere material osagarri hau ondo etorriko zaigu dantzaren inguruan gauden guztioi».