Bigarren olatua: astez aste, handiagoa

Normaltasun berria ekainaren 19an hasi zen Araban, Bizkaian eta Gipuzkoan eta 21ean Nafarroan. Ordurako, izurriaren zabalkundea mugatzea lortu zen, aldagai nagusiek erakusten zutenez, eta egoerari eusteko neurrietan jarri zen konfiantza. Aste horretan, ekainaren 15etik 21era, 130 kasu atzeman zituzten Hego Euskal Herrian. Hurrengo bi asteetan kopuru hori pixka bat murriztu zen: 111, ekainaren 22tik 28ra; eta 90, ekainaren 29tik uztailaren 5era.

Baina hortik aurrera, egoera okertu, eta astez aste gora egin du kasuen kopuruak, etengabe, joan den astean 5.621 kasura iritsi arte. Zer gertatu da azken bi hilabeteotan? Nola pasatu da agerraldietatik olatura? Lurralde guztietan bilakaera antzekoa da edo ezberdina? Nolakoa da bigarren olatuaren neurria edo larritasuna?

Egungo egoera aztertzeko eta galdera horiek erantzuten saiatzeko, hainbat adierazleren datuak bildu eta aztertu dira, argazki orokor bat egiteko: PCR bidez diagnostikatutako kasuak, ospitaleratze berriak, ZIU zainketa intentsiboetako unitatean ospitaleratuak eta hildakoak. Lehenik, begirada udan gertatutakoan jarriko da, eta, ondoren, ikuspegi orokorrago bati helduko zaio.

Positiboak: astez aste, gora

PCR positiboen datuak egunez egun begiratuz gero, gorabeherak ageri dira, baina, uztailaren erdialdetik aurrera, goranzko joera nabarmena da. Halaber, eguneko positiboen kopuruaren marraren punturik gorenak (markak) gero eta gertuago ikusten dira, erraztasun handiagoarekin hausten baitira. Hortaz, denbora gutxian, sei asteren buruan, egun bakar batean 256 positibotik milako langa gainditzeraino.

Astez asteko datuek argiago islatzen dute goranzko joera. Hego Euskal Herriko udako datuetan, uztailaren hasieratik aurrera, argi ikusten da astez aste PCR positiboak etengabe hazi direla, erritmo ezberdinean bada ere. Hasieran, hazkunde handiekin, bi aste jarraian %200 inguruko hazkundearekin. Hurrengo astean, uztailaren 20tik 26ra, 1.471 kasu izan ziren (%63,8ko hazkundea), eta hurrengoan, 1.656 (%12,5eko igoera). Hazkundea geldiarazteko saioek ez zuten espero zen emaitzarik eman, eta hurrengo bi asteetan berriro kasuek gora egin zuten indartsu: abuztuaren 3tik 9ra 2.885 kasu, (%74,2ko hazkundea) eta abuztuaren 10etik 16ra, 3.892 (%34,9ko igoera). Hurrengo astean, hazkundea berriro apaldu zen (%13,6), baina abuztuaren azkeneko astean berriro handitu da (%27,1 ), 5.621 kasu ere izateraino.

Astez asteko PCR positiboak lurraldeka aztertuz gero, egoera eta bilakaera ezberdinak ageri dira. Araban, uztailaren 6ko astetik aurrera, kasuen kopuruak hazkundea izan du astez aste, abuztuaren azken astera arte. Uztailaren lehen hiru asteetan %50 inguruko hazkundea, eta azkenekoan, %176koa. Abuztuko lehen bi asteetan, hazkunde garrantzitsuak izan dira Araban (%75 eta %90ekoak). Hirugarren astean, berriz, apalagoa (%13), eta azkenekoan, aurrekoan baino kasu gutxiago (-%5,6).

Bizkaian pilatzen dira kasu gehienak, eta, horregatik, hango datuek markatzen dute Hego Euskal Herriko joera orokorra. Bizkaian, uztailaren hasieratik, astez aste kasuen kopuruak gora egin du, etengabe. Hazkunde tasarik handienak hasierako asteetan izan ziren. Abuztuaren azken bi asteetan, berriz, hazkundea mantsotu egin da (%11,2 eta %10,1).

Gipuzkoak uztailaren hasieran izan zituen hazkunde handiak aste batetik bestera, Ordiziako, Zarauzko eta Eibarko agerraldiekin. Uztailaren 6tik 12rako astean, %344ko hazkundea, aurreko astearekin alderatuta, eta hurrengo astean, %200ekoa. Baina hurrengo astean, positiboen kopuruak behera egin zuen (-%30). Gutxi iraun zuen beheranzko joerak. Hurrengo astean, uztailaren 27tik abuztuaren 2rakoan, kasuen kopuruak berriro egin zuen gora (%7,6), hurrengo hiru asteetan gehiago (%40 inguru), eta abuztuaren azkenekoan are gehiago (%80,7).

Nafarroan ere gorabeheratsua izan da bilakaera. Hasieran, igoera handiak, uztaileko agerraldiekin (Malerreka, sanferminak, Tuterako ezkontza...), eta, gero, erritmo motelagoan, eta jaitsiera txiki batekin abuztuaren azken aurreko astean. Baina abuztuaren azken astean, hazkundea bizkortu egin da (%58,1).

Ipar Euskal Herriari dagokionez, datuen gabezia da nagusi. Hala ere, zantzuak daude pentsatzeko abuztuan birusaren zabalkundea hazi egin dela. Akitania Berriko Osasun Agentziak test positiboen berri ematen du, baina departamendu mailan bakarrik. Pirinio Atlantikoen Departamenduan abuztuan 463 test positibo inguru zenbatu dituzte, eta kopuruak goraka joan dira astez aste. Horrez gain, zenbait agerraldiren berri eman du: Ziburun bat (hamalau lagun), Baigorrin bi (bederatzi eta hamar lagunekin), Donibane Lohizunen hiru (lau, hiru eta lau lagunekin). Horrez gain, Lapurdiko kostaldean egindako borondatezko behaketan 1.200 proba inguru egin zituzten, eta %3,9k positibo eman zuten.

Ospitaleratze berriak, gora

Kasuak ugaltzearen atzetik, ospitaleratzeen hazkundea etorri da. PCR positiboen igoeraren hasiera uztailaren 6tik 12ra arteko astean nabaritzen hasi bazen ere, ospitaleratzeena hurrengo astean gertatu zen: 10 ospitaleratzetik 27ra pasatu zen (%170eko hazkundea). Hortik aurrera, astez aste ospitaleratze berri gehiago zenbatu dira. Igoerarik handiena abuztuko bigarren astean izan da, %106,1eko hazkundearekin.

Grafikoak beste ikuspegi bat erakusten du: Nafarroan, ospitaleratze berrien hazkundea beste lurraldeetan baino astebete geroago hasten da, eta, oro har, apalagoa da. Eragin handiagoa sumatu da Arabako, Bizkaiko eta Gipuzkoako ospitaleratzeetan, Nafarroakoetan baino. Asteko ospitaleratze berrien kopurua Osasunbideko ospitaleetan sei aldiz handiagoa da abuztuko azken astean, uztailaren 13tik 19ra bitarteko astean baino, eta hamar aldiz handiagoa Osakidetzako ospitaleetan.

Aldi berean, ospitaleratze berrien igoerarekin batera, ospitaleetako betetze maila ere igo da, bai solairuetan, bai zaintza intentsiboetarako unitateetan. Ospitaleratuta dauden pertsonen datuekin arazoak daude serie homogeneoak osatzeko. Batetik, udan datuen argitalpena murriztu delako. Bestetik, Osakidetzaren kasuan, egun bakoitzean solairuan ospitaleratuta dauden gaixoen kopurua txosten epidemiologikoan sartzen hasi direnean (abuztuaren 4an), zenbatzeko irizpidea zorroztu dutelako, COVID-19arengatik ospitaleratuak bakarrik sartuz.

Edozein modutan, igoera nabarmena da. Abuztuaren 4an, 90 pertsona zeuden ospitaleratuta solairuan Hego Euskal Herriko ospitaleetan, eta abuztuaren 31n, 324 pertsona. Kopurua, beraz, hirukoiztu egin da hilabete eskasean. Epe berean, zaintza intentsiboetako unitateetan dauden pertsonen kopurua ere nabarmen hazi da. Abuztuaren 4an, zazpi pertsona zeuden ZIUan, eta abuztuaren 31n, berriz, 43. Sei aldiz gehiago.

Hildakoak: 89 abuztuan

Heriotzak denboran geroago azaltzen ohi dira bilakaera erakusten duten grafikoetan, bizpahiru aste geroago. Ekainean iritsi ziren hildakorik gabeko egunak, baina martxoaren hasieratik ez da izan asterik hildakorik gabe. Apirilaren hasieratik, astez aste hildakoen kopurua gutxituz joan da ia etengabe, uztailaren 20-26ko asteraino, non bi hildako baino ez ziren izan. Baina kutsatzeen eta ospitaleratzeen hazkundearen ondoren hildakoen hazkundea iritsi da, batez ere abuztuan.

Ekainean 83 hildako izan ziren, pixkanaka gero eta gutxiago, kutsatze berrien kopurua jaitsi ondoren. Uztailean, hamalau hildako. Baina abuztuan heriotzak ugaritu dira. Guztira, 89 hildako izan dira; ia erdiak, azken astean.

Bigarren olatua, txikiagoa

Bigarren olatuari neurria hartzeko eta lehenengoarekin alderatzeko, adierazle egokiak bilatu behar dira. PCR positiboen kopurua ez da oso adierazle egokia. Udako datuak ezin dira alderatu martxoko eta apirileko datuekin. Orduan, askoz proba gutxiago egiten zituzten, eta gehienbat diagnostikoa baieztatzeko erabiltzen zituzten. PCR proben bidez, COVID-19 kasuak atzemateko gaitasuna askoz handiagoa da abuztuan, martxoan edo apirilean baino. Beraz, abuztuan egun bakar batean milatik gora kasu atzemateak ez du esan nahi orain martxoan edo apirilean baino kutsatu gehiago dagoenik.

Ospitaleratze berrien kopurua eta hildakoen kopurua adierazle hobeak dira lehen olatua eta bigarrena alderatzeko.

Grafikoan ikusten denez, bigarren olatuko ospitaleratze berriak askoz gutxiago izan dira lehendabizikokoak baino. Lehen olatuan, martxoan 5.437 ospitaleratze izan ziren, apirilean 3.897 eta maiatzean 596. Guztira, 9.930 ospitaleratze. Bigarren olatuan, berriz, ekainean 77 pertsona ospitaleratu zituzten, uztailean 133, eta abuztuan 904. Guztira, 1.114. Hau da, lehen olatuan, ospitaleratzeak bederatzi aldiz gehiago izan ziren (zehazki, 8,91 aldiz).

Olatuak alderatzeko beste datu interesgarria ospitaleetako betetze maila da. Lehen olatuan, ospitaleratuen kopururik handiena martxoaren 31n erregistratu zen, 2.818 ospitaleraturekin. Bigarren olatuan, ospitaleratuen kopururik handiena abuztuaren 31n izan da: 367 gaixo. Beraz, lehen olatuko gehieneko betetze maila 7,6 aldiz handiagoa izan zen oraingoa baino. Halaber, zaintza intentsiboetarako unitateen gehieneko betetze maila ere askoz handiagoa izan zen lehen olatuan, bigarrenean baino. Apirilaren 2an, 327 pertsona egon ziren ospitaleratuta ZIUan. Bigarren olatuan, gehieneko kopurua 46 izan da, abuztuaren 30ean. Beraz, lehen olatuko gehieneko kopurua 7,1 aldiz handiagoa izan zen bigarrenekoa baino.

Azkenik, hildakoen kopurua ere alderatu daiteke. Martxoan, apirilean eta maiatzean, 2.066 hildako izan dira Euskal Herrian koronabirusarekin lotuta. Ekainean, uztailean eta abuztuan 186 izan dira. Beraz, izurriaren lehen hiru hilabeteetan hildakoen kopurua 12 aldiz handiagoa izan da hurrengo hiru hilabeteetan baino.

Argi dago, beraz, bigarren olatua lehena baino askoz txikiagoa dela, eta haren hazkunde erritmoa askoz mantsoagoa dela. Baina zein da alderaketaren arazoa? Lehen olatua benetako osasun hondamendia izan dela, eta geldiarazteko oso konfinamendu gogorra behar izan duena, ondorio sozioekonomiko larriekin. Bigarren olatua hondamendi batekin alderatzeak haren garrantzia gutxiestera eraman dezake. Eta hilabete batean, adibidez abuztuan, 89 hildako egotea ezin da inolaz ere gutxietsi. Hala edo nola eragotzi behar den tragedia baita.

Zer da kezkagarria bigarren olatuan? Hazkunde etengabea parametro guztietan. Hau da, kasuen zabalkundea, ospitaleratuen hazkundea eta hildakoen hazkundea geldiarazteko eta gutxitzeko ezintasuna. Beste era batera esanda, pandemia kontrolatzeko neurrien eraginkortasun mugatua.