Bi mezu

Otegik atzo esan zuenean «Gaur preso politiko bat irten da kartzela espainiar batetik», Bohumil Hrabal idazle txekiarraren bi libururen izenburuak etorri zitzaizkidan gogora: lehendabizikoak, Zorrotz begiratutako trenak, preso politikoaren kartzelaldia laburbiltzen du. Kartzelak eta kartzela-politikak ez dute deus izan tren baten iruditik, ez dira beren tokitik mugitu, baina hain zorrotz begiratu dituzten trenak —Otegi eta Otegik ordezkatzen duena— ez dira geldi egon. Begiraleei legezko amarruen bateria guztiz ahitu zaienean atera dute Otegi, eta nahiz politikariak enegarrenez berretsi duen trena bakearen bidetik eramateko asmoa, laster kargatuko dute ostera ere bateria.

Hrabalen bigarren izenburuak, Jada bertan bizi nahi ez dudan etxe bat dut anuntzio Otegiren trena nondik datorren eta helmuga seinalatzen ditu: Espainia da Otegik bertan bizi nahi ez duen etxe hori, etxe berri bat eraikitzeko borondate betikoa egin du anuntzio.