Bakea

Tabernan jende gutxi egon ginen abagunea aprobetxatuta, oihu egin zion tabernariari: «ekarri duzu kirol egunkaririk, ala oraindik ez?». Hiru egunkari eta tokiko Hitza egoten dira taberna horretan goizero. Ez zituen nahikoa, antza. Ez zion balio beste hiruretan kirolaz dakarrenak, berak beste bat nahi zuen. Guztiok entzuteko moduan esan zuen, hipikaz baino ez bada ere, gustura irakurriko lukeela, baina tabernarien burugogorkeriak horretarako aukerarik gabe uzten dutela. Tabernaria isildu egin zen. Ez naiz harritzen: guztiok nahi genuen gizon hori isildu zedin. Beste guztiok isilduta ere, berak bere ahotsa entzuten jarraitzen zuen, ordea.

Ez dakit tabernaria gizona izan balitz berdin egingo lukeen, baina ezetz esatera ausartuko naiz. Ez dakit normalean joaten den tabernan kirol egunkaririk egon badagoen ere, baina gurean dauden aukerak ikusita, ia ziur ezetz. Uste dut badakidala zer asmo gordetzen zuen bere showak: jende guztiari erakustea bera normalean ez dela emakumeek kudeatzen duten taberna horretara joaten, eta joaten denean, emazteari laguntzera joaten dela; eta bera egoten den tabernetan gauza interesgarriak kontatzen dituen egunkariak egoten direla, eta guk aukera hori galdu egiten dugula.

Bada, ez daki berak ze bake izaten den bera ez datorrenean.