astekaria 2019/05/17
arrowItzuli

iritzia

Napardeath

Jaume Gelabert

Napardeath Jaume Gelabert

«Guardia Zibila, 175 urte zure ondoan» da erakunde armatuak bere urteurrena oroitzeko -eta oroitarazteko- aukeratu duen goiburua. Gure ondoan, gure gainean, atzean zein aurrean izan dira 175 urtez -neuronen arteko ausazko talka jostalariak zer diren, Guardia Zibilarena ezagutu eta berehala beste lelo bat, «40 urteko bakea», etorri zait burura; jakin ezazu zergatik-, eta, noski, efemerideak bere neurriko ospakizuna eskatzen du. Erakunde armatu bakezaleak hainbat ekitaldi antolatu ditu Nafarroan: bakea ezartzeko erabiltzen dituen teknika ez-bortitzak erakusteko, tiroka aritu dira guardiak Iruñeko zezen plazan -eta dohain erakustaldiaren irudiek iazko beste urtemuga bat oroitarazi didate, 2018an 40 urte bete baitziren 1978ko sanferminetako gertaerak izan zirenetik. Neurona bihurriak-; Altsasun, Foruzaingoaren laguntza solidarioaz, azken hiru hilabeteetan 142 kontrol eskaini dizkie Sakanako bizilagunei -ezagututa erakunde armatu bakezale saiatuak mugak gainditzeko duen bokazioa, erronka «175 urte, 175 kontrol 175 egunetan» izanen zen segur aski-; eta, berriz Iruñean, oinkada martzialez desfilatu dute berdez jantzitako agenteek hiriburuko karriketan barna.

Jarraitu du festak eta argazki gogoangarria utzi digu ospakizunak: Alli eta Sanz presidente ohiak Del Burgorekin -hura ez zen presidente izan, ezta?- solasean bilduak. Hirukotea eta Alliren txapel kondekorazioduna ikusita, Napardeath film apartako pertsonaiak -zonbiak, banpiroak eta zonbiroak- irudikatu ditut. Zinema aretoan egin bezala, barrez lehertu naiz hil bizidun foralak ikusi ditudanean; bestelako sentimenduak izan ditut, ordea, ohartu naizenean zonbien oinordekoek boterea eskuratu eta Nafarroa zonbi-herri bihur lezaketela, baita argazkiaren kokapenaz oroitu naizenean ere: erakunde armatu bak... Guardia Zibil beldurgarria goraipatzeko festan.

BERRIAn argitaratua (2019/05/15)


Informazio gehiago berria.eus-en

Izan zaitez berrialaguna


HASIERA