Mundu gerra

Hirugarren Mundu Gerra saihestu zuen ofizial sobietarra, Stanislav Petrov, hil da. 1983eko ekainaren 25etik 26rako gauean, Ameriketako Estatu Batuen eta Ekialdeko Blokearen artean, Gerra Hotz betean, Hirugarren Mundu Gerra saihestu zuena, zehaztu behar da, suposatzekoa denez, bigarrena amaitu zenetik orain arte hamaika aldiz, hamaika mila aldiz, saihestu izan dela, gu ohartu ez arren, Hirugarren Mundu Gerra. Bada esaten duenik, gu ohartu ez arren, dagoeneko sartuta gaudela hartan, aurkariak aldatuta, gerra egiteko modua ere aldatuta, eta beharbada ez HMG bakar bat, baizik eta aldi berean hainbat bizitzen ari garela. Hala balitz, Hirugarren Mundu Gerra balizko baten inguruan jardutea funtsezkoan arreta galarazteko estrategia litzateke.

Asteartean irakurri dut Stanislav Petrov, Hirugarren Mundu Gerra saihestu zuen ofizial sobietarra, hil dela, justu Donald Trumpek Nazio Batuen Erakundean lehenengoz hitz egin duen egun berean, herrialde oso bat lurrarekin berdindu behar duela esanez, herrialde horretako agintariak esanen lukeenaren ez oso bestela. Letra xehea leituta jakin dut maiatzean hil zela berez Petrov. Norbaitek, hori orain aterata, Hirugarren Mundu Gerra enegarrenez saihetsi nahi du, dagoeneko hasi ez balitz.