gizartea
Homofobia errealitate denean
Ekhi Erremundegi Beloki
INPES Frantziako Osasun Prebentzio eta Heziketa Institutuaren arabera, gizon homosexual eta bisexualen artean beren buruaz beste egiten saiatzen direnen kopurua heterosexualena baino lau aldiz handiagoa da (%17). Gazteenen artean, kasik %30era iristen da kopurua. Les Bascos elkartean, eskola eremuan gertatutako zazpi kasuren berri izan dute. «Jazarpen fenomenoak, eskolagabetzeak, beren buruaz beste egiteko saiakerak eta arrisku hartze andana aurkitu ditugu, maleruski», kontatu du Philippe Casenave elkarteko gizarte laguntzaileak. Gaineratu du gurasoek ere «zailtasunak» izaten dituztela anitzetan, eta horiei ere harrera egiten dietela.
Lan eremukoak dira homofobia kasu anitz, eta hor ere jazarpen fenomenoak eta bakartze sentimenduak lotzen direla esplikatu du Casenavek, biktima «bere errua ote den» galdetzera eramaten dutenak. «Batzuetan, biktimak berak barneratua du homofobia hori, eta nahiago du dimititu, gertaerak salatu eta denen aurrean agertu baino». Gehienetan zuzendaritza egoeraren jakitun dela dio, eta ordezkari sindikalekin ere arazoak sortu izan direla aitortu du. «Aurreiritzi anitz dute, oraindik».
Sindikatuetako zuzendaritzek LGTB pertsonen eskubideen defentsa hartzen badute ere, enpresetako egunerokoan zailagoa da, Gachenen iritziz. «CGTko ordezkari sindikal batek kontatu zidan, zintzotasun osoz, orain dela urte batzuk gay pride-an parte hartzera joaten zenean CGTren itsasgarria jartzen zuela aski agerian, inork ez zezan pentsa homosexuala zela», oroitu du Casenavek.
Estereotipoek indar handia dute oraindik: homosexual baten babesa hartuz gero beraiek ere homosexualak direla pentsatzearen kezka dute anitzek, elkartekoen arabera. «Hori da egiazko bizia». Adibide zehatza eman du Gachenek: «Irakaslea naiz. Ikastetxean, astelehen goizarekin, familiarekin pasatutako asteburua kontatzen dute lankide guziek. Halako egoeran, ez baduzu hasieratik zure homosexualitatea agertzen, erran gabeko zerbait bilakatzen da. Denborarekin, gero eta zailagoa bilakatzen da isiltasun hori urratzea, eta biziki egoera zailak sor ditzake. Guregana etortzen diren anitz beren pertsonaren deseraikuntza prozesu batean dira».
Salaketa ematea bera zailtasun iturri da, eta anitzek ez dute nahi izaten, polizia etxean eginen dieten harreraren beldur. Biktimekin lan egiten dutenen formakuntza ekintzak beharrezko ikusten ditu Gachenek. Izan ere, Les Bascos elkartera jo duten batek baino gehiagok azaleratu dute eraso baten biktima izan eta zailtasunak izaten dituztela eraso horren ezaugarri homofoboa identifikatzeko.
Eskoletan eta elkarteekin prebentzio lana indartu nahi du Les Bascos elkarteak. Halaber, Txalaparta egoitzako harrera gunea indartzeko borondatea ere agertu dute.