iritzia
Zakilaren mintzoa
Iñigo Aranbarri
Eta uste dut ezinikusi atabiko horrexek berak poztu duela bat baino gehiago jakinarazi zaigunean Iruñeko bortxaketan guardia zibila dela erasotzaileetako bat, lehendik genekiena sendotzera baitator. Nekane Txapartegiren salaketa berpiztu digute; Amaia Urizarrena, umetokiraino sartu zioten pistola galdeketan. Kristina Getek makila ibili ziotela alu-uzkietan kontatu zuen. Ane Beristainek titiburuak erre zizkiotela kiskero batez. Rita Margarete R. brasildarrak Indautxuko komisaldegian bortxatu zuten bi polizia salatu zituen...
Psikologiatik antropologiara, luze mintza gaitezke «segurtasun indarrek» atxilotuei egindako sexu erasoez. Unibertsala da. Boterea da, biktima minduran muineraino umiliaturik, indarra, hierarkia, zakilaren mintzoa erakusten. Baina Iruñean atxilotutako guardia zibilarena nabarmenduta ez dakit ez ote gabiltzan beste zerbait gorde nahian, ez ote zaigun irakurtzen ahaztu, badakigulako indarrarenak, hierarkiarenak, zakilaren mintzoarenak ez duela komisaldegirik behar, askozaz ere gertuago, norbera izutzeko bezain gertu dugula.