Mila esker, Idoia

Eta aitortza bat: gustatu zait zure bideo polemikoa. Baina, amiga, asteon tokatu egin zaizu, lehengoan Pili Zabala eta bere txaletari legez, txorimaloa izatea. Ez gaizki uler, arren, sareko txiolariak bazter guztietatik mokoka ari zaizkizula esan gura dut. Kanpainaren lehen egunetan apenas aipatu zintuen inork, ordea, astelehenaz geroztik zeu guztien jo puntu. Latzak bota dizkizute gero! Gorrotoa eta beldurra sustatu guran zabiltzatela; diskurtso biktimista eta genozida duzuela; bideoa lotsagarria, higuingarria izan dela... Eta, egia esanda, ados nago neu ere horiekin denekin, baina, hala ere, gustatu zait bideoa, euskara hauteskunde kanpainaren erdigunera ekarri duelako. Aspaldion halaxe baikenuen beheko sua, apal, harik eta zuk hauspotu duzun arte. Eta bat-batean denak belarrietatik kea dariela! Ala uste duzu zugatik izan ez balitz hain gartsu jardungo zirela gaiaz?

Gehiago esango dizut, oxala, zure hautagaikide euskaldunek ere zuk bezain diskurtso erradikala balute hizkuntzaz; alegia, zuri egurra emateaz gain, egur gehixeago sartuko baliote su bajuari. «Erradikala» diot, bai, eta adjektibo hori kriminalizatzeko joera dagoenez, etimologia argitzea komeni: latineko radix-etik (raíz gazteleraz, racine frantsesez) dator «erradikal». Oxala hautagai eta alderdi euskaldunek, sustraietatik helduko baliote hizkuntzaren auziari.